Google Gemini

 گوگل جیمینائی (Google Gemini)

گوگل جیمینائی (Google Gemini) کی طرف آتے ہیں۔ یہ ٹول خاص طور پر ان اساتذہ کے لیے نہایت مفید ہے جو کتاب، تصویر، سوال اور وضاحت کو ایک ساتھ جوڑ کر پڑھانا چاہتے ہیں، اور جن کے پاس وقت کم مگر ذمہ داری زیادہ ہوتی ہے۔

گوگل جیمینائی دراصل گوگل کی طرف سے تیار کیا گیا جدید مصنوعی ذہانت پر مبنی ٹول ہے، جسے پہلے Bard کے نام سے جانا جاتا تھا، اور بعد میں اسے مزید بہتر بنا کر Gemini کے نام سے متعارف کروایا گیا۔ یہ ٹول گوگل کی برسوں کی تحقیق کا نتیجہ ہے اور اسے اس مقصد کے لیے بنایا گیا کہ انسان تحریر، تصویر اور معلومات کے ساتھ قدرتی انداز میں بات چیت کر سکے۔ تعلیم کے میدان میں اس کی اصل طاقت یہی ہے کہ یہ دیکھے گئے مواد کو سمجھ کر اس پر کام کر سکتا ہے۔

روایتی تدریس میں استاد کتاب کھولتا ہے، سبق پڑھتا ہے، خود سمجھتا ہے، پھر بچوں کو سمجھانے کی کوشش کرتا ہے۔ گوگل جیمینائی اس عمل میں استاد کا وقت بچاتا ہے۔ مثال کے طور پر اگر استاد کسی سبق کا صفحہ موبائل سے تصویر کی شکل میں لے کر جیمینائی میں اپلوڈ کر دے اور لکھے کہ “اس سبق کو جماعت چہارم کے بچوں کے لیے آسان زبان میں سمجھائیں”، تو یہ ٹول اسی تصویر کو دیکھ کر سادہ وضاحت تیار کر دیتا ہے۔ یہ سہولت خاص طور پر ان اساتذہ کے لیے بہت مددگار ہے جو فوری تیاری کے ساتھ کلاس میں جاتے ہیں۔

عملی تدریس کی ایک مثال دیکھیں۔ فرض کریں سائنس کی کتاب میں “پانی کا چکر” دیا گیا ہے، مگر زبان مشکل ہے اور بچے سمجھ نہیں پا رہے۔ استاد اس صفحے کی تصویر جیمینائی میں دے کر کہہ سکتا ہے کہ “اس سبق سے تین آسان سوالات، ایک مثال اور ایک روزمرہ زندگی سے تعلق بنا دیں”۔ چند لمحوں میں استاد کے پاس پڑھانے کا مکمل خاکہ موجود ہوتا ہے، جسے وہ فوراً کلاس میں استعمال کر سکتا ہے۔

یہ ٹول اردو اور انگریزی دونوں میں کام کر سکتا ہے، جو پاکستانی اساتذہ کے لیے ایک بڑی سہولت ہے۔ اردو میڈیم اسکولوں میں انگریزی مضمون پڑھاتے وقت استاد جیمینائی سے جملوں کی آسان تشریح، ترجمہ اور بولنے کی مشق بھی تیار کروا سکتا ہے۔ اس طرح زبان کا خوف آہستہ آہستہ کم ہونے لگتا ہے۔

گوگل جیمینائی اسیسمنٹ میں بھی مدد دیتا ہے۔ استاد کسی سبق کا خلاصہ دے کر کہہ سکتا ہے کہ “اسی مواد پر MCQs، درست یا غلط سوالات اور ایک تخلیقی سوال بنا دیں”۔ یہ سب سوالات استاد گوگل فارمز یا کہوٹ میں استعمال کر سکتا ہے۔ یوں ایک ٹول دوسرے ٹول کو مضبوط کرتا ہے، اور تدریس ایک مربوط نظام بن جاتی ہے۔

نان فارمل اسکولوں میں جہاں اساتذہ کو ملٹی گریڈ کلاس پڑھانی ہوتی ہے، وہاں جیمینائی بہت کام آتا ہے۔ ایک ہی سبق کو مختلف جماعتوں کے لیے مختلف سطح پر سمجھانا ہو تو استاد صرف یہ لکھ دے کہ “اسی موضوع کو جماعت دوم، سوم اور چہارم کے لیے الگ الگ انداز میں سمجھائیں”۔ ٹول فوراً سطح کے مطابق مواد فراہم کر دیتا ہے۔

گوگل جیمینائی استعمال کرنا بھی نسبتاً آسان ہے۔ موبائل یا کمپیوٹر میں انٹرنیٹ ہو تو گوگل میں Gemini لکھیں یا gemini.google.com کھولیں۔ گوگل اکاؤنٹ سے لاگ ان کریں، اور چیٹ کی طرح سوال لکھنا شروع کریں۔ موبائل صارفین کے لیے اس کی ایپ بھی دستیاب ہے۔ تصویر اپلوڈ کرنے، متن لکھنے اور جواب لینے کا عمل سادہ اور تیز ہے۔

یہ بات واضح رہنی چاہیے کہ گوگل جیمینائی بھی ایک معاون ٹول ہے، استاد کا متبادل نہیں۔ یہ استاد کو مواد دیتا ہے، مگر یہ استاد کی ذمہ داری ہے کہ وہ بچوں کے مزاج، ماحول اور سطح کے مطابق اس مواد کو ڈھالے۔ جو استاد سوچ سمجھ کر اس ٹول کو استعمال کرتا ہے، وہ کم وسائل کے باوجود مؤثر تدریس کر سکتا ہے۔

اب تک اس سلسلے میں اساتذہ کے پاس ایک مضبوط ترتیب بن چکی ہے۔

چیٹ جی پی ٹی سوچ اور تحریر کے لیے،

کینوا بصری وضاحت کے لیے،

گوگل فارمز اور کہوٹ اسیسمنٹ اور دلچسپی کے لیے، اور گوگل جیمینائی کتاب، تصویر اور سبق کو سمجھنے اور توڑنے کے لیے۔

منصور اختر غوری